بيني وبينك يا قمر موضوع إنك تعرفي تلبسي إيه وأنت رايحة أي حفلة محتاج منك تفكير في شوية الحاجات البسيطة دي.. أولا: مكان الحفلة فين علشان
تعرفي تحددي لبسك اللي هتجيبيه ده محتاج منك في الأول إنك تعرفي مكان
الحفلة دي فين وده لأن كل مكان وله لبس محدد.. فمثلا لو كانت الحفلة دي في
بيت يبقى إنت في الوقت ده هتحتاجي إنك تلبسي "تايير بسيط" أو "بدلة بسيطة".
لكن لو كانت الحفلة دي في قاعة يبقى في الوقت ده عندك حرية أكتر في
الاختيار ما بين "تايير سواريه" أو" بدلة سواريه" أو "فستان سواريه".. ثانيا: نوع الحفلة بعد
ما عرفتي المكان اللي إنت هتروحي تحضري فيه بقى أهم حاجة وهي إنك تحددي
نوع الحفلة دي إيه؟! طبعا مش فاهمة قصدي ما تخافيش حالا هاقولك قصدي إيه..
شوفي يا قمر لو كنت رايحة مثلا حلفة خطوبة وهتلبسي فستان سواريه يبقى لازم
تاخدي بالك إن الفستان ده يكون بسيط ومفيش فيه شغل كتير وده علشان الفستان
اللي فيه شغل كتير ممكن يلفت نظر الموجودين في حفلة الخطوبة دي ليكي
ولفستانك والموضوع ده ممكن يضايق العروسة اللي المفروض يكون الاهتمام
الأكبر بيها هي وفستانها علشان كده دايما بننصح أي بنت رايحة تحضر حلفة
خطوبة إنها تكون بسيطة في لبسها وماكياجها وده علشان تدي فرصة للعروسة
إنها تبان.
لكن لو كانت المناسبة حفل زفاف يبقى البسي اللي إنت عايزاه وده لأن
العروسة في حفل الزفاف بتبقى لابسة فستان الفرح الأبيض ومفيش حاجة ممكن
إنها تغطي على جمال الفستان الأبيض. ثالثا: طبيعة جسمك لو قررتي تجيبي فستان سواريه يبقى لازم في الأول تشوفي طبيعة جسمك وفي ضوء كده تحددي شكل الفستان اللي إنت هتجيبيه فمثلا لو.. • كنتِ قصيرة وجسمك مليان..
يبقى في الوقت ده تبعدي عن الفساتين المصنوعة من أقمشة مزخرفة وفيها ألوان
كتير وده لأن الأقمشة المزخرفة دي هتخليكي تباني كأنك أقصر.. لكن طبعا لو
اخترتي فستان من لون واحد ده هيخليكي تظهري أكثر طولا وجسمك يبان أنحف.
• لو كنتِ رفيعة وطويلة..
يبقى
يا ريت تختاري الفستان اللي فيه ألوان كتير أو مصنوع من أقمشة مزخرفة لأن
الأقمشة دي هتخفي عيب جسمك الرفيع وهتبينك ممتلئة وأقل طولا. • لو كنتِ رفيعة ومتوسطة الطول..
يبقى مش هتحتاري في اختيار الموديل المناسب ليكِ لأنك هتلاقي كل الموديلات
بلا استثناء لايقة عليكِ وهتكوني مش زي القمر، لا هتكوني القمر نفسه. • لو كان جسمك مليان وطويلة..
يبقى برضه اختاري الألوان السادة وخصوصا الغامقة لأن الألوان دي بالذات هي
اللي هتساعدك على إخفاء عيوب جسمك، كمان ياريت تختاري فستان من قطعتين
علشان يكون عندك فرصة لتضييق منطقة الخصر والبطن... وابعدي نهائياً عن
الموديلات اللي بتكون ضيقة من عند الخصر ونازلة على واسع من تحت لأن
الموديلات دي هتبرز عيوب جسمك. • لو كان عندك بطن "كرش"
يبقى ياريت تختاري فستان ضيق شوية من منطقة الوسط ويكون فيه تطريز في المنطقة دي علشان تخفي عيب الكرش ده. • لو كنتِ ممتلئة الذراع
يبقى يا ريت تختاري الفستان اللي كمه واسع وابعدي عن الفساتين اللي كمها
ضيق ويا ريت كم الفستان يكون من نفس قماش الفستان وبلاش تجيبي فستان (كات)
أو بحمالات وتلبسي تحته بادي ضيق؛ لأن ده كمان هيبرز ذراعك.. لكن لو قررتي تجيبي بدلة أو تايير يبقى لازم تاخدي بالك من شوية الحاجات دي.. 1-
لو كنتِ عريضة من عند الأرداف يبقى اختاري البدلة اللي الجاكيت بتاعها
يكون مغطي المنطقة دي وابعدي نهائي عن الجاكيت الطويل لأنه هيبين المنطقة
دي بحجم أكبر من حجمها الطبيعي. 2-
لو كنت رفيعة يبقى ممكن تختاري البدلة المكونة من بنطلون واسع وجاكيت طويل
وابعدي عن التاييرات القصيرة أو اللي تكون الجوب بتاعها صاك؛ لأنها هتبينك
أنحف. 3- لو كان جسمك مليان يبقى اختاري التاييرات اللي ألوانها غامقة واللي تكون الجوب بتاعها صاك علشان تخفي عيب جسمك. رابعا: لون بشرتك حاولي
تختاري الألوان اللي تبرز جمال بشرتك وتفتحها أكتر ودي هتعرفيها وإنت
بتقيسي لما تقفي قدام المرآة وتشوفي إذا كانت الألوان دي فعلا لايقة عليكِ
ولا لأ.... بس يا قمر ده كان شوية كلام بسيط كده بيني وبينك إوعي تقولي لحد عليه تعالى بقى نشوف الموضه 
ودي الموديلات والألوان الجديدة اللي نازلة في 2009
مجموعة الفساتين
الدرجة دي من اللون الأزرق نازلة جديد واللون ده مناسب للبنت اللي بشرتها
بيضاء وعلى فكرة التصميم ده مناسب للبنت الرفيعة واللي جسمها مليان
البني المحروق رجع موضة تاني في 2009 بعد ما اختفى لفترة وعلى فكرة الشكل ده مناسب للبنت اللي جمسها متناسق
واللون الموف مناسب جدا للبنت اللي بتحب تكون متميزة في اختيار ألوانها...
على فكرة الشكل ده مناسب للبنت اللي عندها "بطن" علشان التطريز اللي موجود
فيه هيداري امتلاء منطقة البطن
ولو عايزة تتألقي فعلا يبقى اختاري اللون النبيتي... على فكرة اللون ده
بيليق على البنت اللي بشرتها فاتحة والبنت اللي بشرتها غامقة لأنه بيفتحها
وده طبعا على عكس ما فيه ناس كتير فاكرة إن اللون ده بيغمق البشرة
واللون الذهبي هو الموضة الجديدة في سواريهات 2009
طبعا الأسود هو الملك المتوّج على عرش السهرات بس التصميم اللي إنت شايفاه ده جديد جدا ويناسب البنت اللي جسمها مليان وجسمها متناسق
لو عايزة تبقي بنت رقيقة فعلا يبقى اختاري الشكل واللون ده
ودايما اللون الأحمر هو الاختيار المفضل للبنت الجريئة
ومع اللون الأسود × أبيض هتحسي فعلا بالتألق
ومع الشكل ده ممكن تختاري أي لون إنت عايزاه وتعملي تصميم زيه بالضبط
مجموعة البدل والتاييرات
تايير سواريه نبيتي يناسبك لو كنت هتحضري حلفة خطوبة أو فرح في أي قاعة أو في البيت.
بدلة سواريه سوداء فيها تطريز من على التوب ومن على الجاكيت ممكن تختاري التصميم ده وتعملي زيه بدلة باللون اللي إنت عايزاه
تايير سواريه أحمر فيه تطريز من على الجوب هتحسي معاه فعلا بإنك في منتهى الشياكة
تايير بسيط مناسب لو كنت هتحضري حفلة في بيت
دي كمان بدلة بسيطة تقدري تلبسيها وتحضري بيها أي حفلة في البيت
منقوووووووووووول
موضوع: تألقى فى سهرات 2009 
الإثنين ديسمبر 22, 2008 5:41 pm
